Եթե դուք դեռ ամեն անգամ Google-ում փնտրում եք “Remove background free” կամ ժամեր եք ծախսում վեկտորային պատկերներ նկարելու վրա, ապա շարունակեք կարդալ այս հոդվածը։
Պատկերացրեք իրավիճակ. ժամը 02:00-ն է, վերջնաժամկետը՝ առավոտյան։ Փոխարենը զբաղվելու բուն ստեղծագործական պրոցեսով՝ դուք ժամեր եք վատնում տեխնիկական մանրուքների վրա՝ փորձում եք «փրկել» հաճախորդի ուղարկած անորակ լոգոն, փնտրում եք համապատասխան ֆոնտ, որն անվճար կլինի, կամ հարյուրերորդ անգամ փորձում եք ֆոնը հեռացնել նկարից Photoshop-ի «կախարդական փայտիկով»։
Ծանո՞թ է։
Դիզայնը մտքի թռիչք է, ոչ թե մեխանիկական աշխատանք։ Եթե դուք դեռ կատարում եք վերոնշյալ գործողությունները ձեռքով, ուրեմն խլում եք ինքներդ ձեր ժամանակը։
Այս հոդվածում հավաքել ենք 5 շատ օգտակար և լիովին անվճար գործիք, որոնք կազատեն ձեզ մեխանիկական աշխատանքից՝ թողնելով ժամանակ ստեղծագործելու համար։
1. TinyWow | Թվային «Շվեյցարական դանակ»
TinyWow-ն բազմաֆունկցիոնալ հարթակ է, որը հաջողությամբ փոխարինում է մոտ մեկ տասնյակ վճարովի ծրագրերի։ Այն առաջարկում է ավելի քան 200 գործիք՝ տեխնիկական խնդիրները լուծելու համար՝ առանց պարտադիր գրանցման և առանց «փորձնական ժամկետի» (trial) սահմանափակումների։
Հիմնական հնարավորությունները.
- Պատկերների ակնթարթային մշակում. Հեռացրեք ֆոնը (Background Remover) կամ մաքրեք անցանկալի օբյեկտները (Magic Eraser) վայրկյանների ընթացքում՝ առանց Photoshop-ի նման ծանր ծրագրեր գործարկելու։
- PDF ֆայլերի ճկուն կառավարում. Փոխարկեք PDF-ը խմբագրվող Word փաստաթղթի, միավորեք տարբեր ֆայլեր կամ առանձնացրեք բարձրորակ պատկերները անմիջապես PDF-ից՝ պահպանելով ելակետային որակը։
- Ֆորմատների անխափան փոխարկում. Լուծեք անհամատեղելիության խնդիրները, օրինակ՝ iPhone-ի HEIC նկարները JPG դարձնելով, կամ օպտիմիզացրեք պատկերները WebP ձևաչափով՝ վեբ-կայքերի արագագործությունն ապահովելու համար։
2. Upscayl | Արհեստական բանականություն՝ պիքսելների դեմ
Հաճախ հաճախորդը լոգոն կամ անհրաժեշտ նկարն ուղարկում է մեսենջերով կամ սքրինշոթի տեսքով։ Սովորական եղանակով մեծացնելու դեպքում (Bicubic enlargement) պատկերը դառնում է աղոտ և պիքսելային։ Upscayl-ը բաց կոդով (open-source) ծրագիր է (Mac/Windows/Linux), որը պետք է ունենա յուրաքանչյուր դիզայներ։
Ինչու՞ է այն առանձնահատուկ.
- AI վերականգնում. Օգտագործելով խորը ուսուցման (Deep Learning) ալգորիթմներ՝ ծրագիրը ոչ թե պարզապես ձգում է նկարը, այլ վերականգնում և ավելացնում է բացակայող դետալները։
- Տպագրական որակ. Ցածր որակի նկարը վերածեք 4 անգամ (կամ ավելի) մեծ և հստակ պատկերի, որը պիտանի կլինի նույնիսկ մեծ պաստառների համար։
- Midjourney-ի լավագույն ընկերը. Հիանալի գործիք է AI-ով գեներացված նկարների որակը բարձրացնելու համար։
3. Realtime Colors | Գունային գրագիտություն՝ իրական ժամանակում
Գունապնակ (Palette) ընտրելիս մենք հաճախ խաբվում ենք՝ տեսնելով գույները մեկուսացված։ Իրական նախագծում դրանք կարող են դիտվել այլ կերպ կամ լինել անընթեռնելի։ Realtime Colors-ը թույլ է տալիս տեսնել գույների ազդեցությունը իրական կայքի օրինակի վրա՝ հենց փոփոխման պահին։
Առավելությունները.
- Իրական փորձարկում. Տեսեք ձեր ընտրած գույները Dashboard-ի, Landing Page-ի կամ բլոգի իրական մոկապների (mockup) վրա։
- Հասանելիություն (Accessibility). Գործիքն օգնում է ստուգել կոնտրաստի բավարար մակարդակը՝ ապահովելով տեքստի ընթեռնելիությունը բոլոր օգտատերերի համար։
- Հեշտ արտահանում. Մեկ հպումով արտահանեք հաստատված գունապնակը Figma կամ ստացեք անհրաժեշտ կոդը։
4. Recraft.ai | Վեկտորային գրաֆիկայի նոր դարաշրջան
Midjourney-ն և Dall-E-ն հրաշալի են, բայց դրանք տալիս են ռաստրային (JPG/PNG) նկարներ։ Լոգոների, icon-ների և իլյուստրացիաների համար դիզայներին անհրաժեշտ է վեկտոր (SVG), որը ենթակա է անսահմանափակ խմբագրման։ Recraft.ai-ը լուծում է հենց այս խնդիրը։
Հնարավորությունները.
- Վեկտորային գեներացիա. Նկարագրեք ձեր ցանկալի պատկերը և ստացեք այն SVG ֆորմատով։
- Խմբագրելիություն. Արդյունքը կարող եք տեղափոխել Figma կամ Adobe Illustrator՝ գույները, ձևը կամ գծի հաստությունը փոփոխելու համար։
- Ոճային միասնություն. Ստեղծեք icon-ների ամբողջական հավաքածուներ՝ պահպանելով միասնական ոճը։ Սա կխնայի ժամեր, որոնք կծախսեիք “Pen Tool”-ով նկարելու վրա։
5. Fontshare | Պրեմիում տիպոգրաֆիկա՝ առանց ծախսերի
Լավ դիզայնի 90%-ը կախված է ճիշտ ընտրված տառատեսակից։ Google Fonts-ի համատարած կիրառումը հանգեցնում է դիզայնի միօրինակացմանը, իսկ յուրահատուկ ֆոնտերը սովորաբար թանկ արժեն։ Fontshare-ը Indian Type Foundry-ի նվերն է դիզայներական համայնքին։
Ինչու՞ ընտրել Fontshare.
- 100% անվճար. Այստեղ տեղադրված են պրոֆեսիոնալ, վճարովիի որակի տառատեսակներ, որոնք անվճար են թե՛ անձնական, թե՛ կոմերցիոն նախագծերի համար։
- Անվտանգություն. Բացակայում է լիցենզիոն խնդիրների ռիսկը, ինչը հաճախ պատահում է ինտերնետից պատահական “free font” ներբեռնելիս։
- Խորհուրդ. Փորձեք Satoshi կամ Clash Display տառատեսակները՝ ձեր հաջորդ նախագծին ժամանակակից և թանկ տեսք հաղորդելու համար։
Այսպիսով, ձեր տրամադրության տակ արդեն ունեք հինգ լիովին անվճար գործիք, որոնցով կարող եք իրականացնել դիզայնի ստեղծման գրեթե բոլոր տեխնիկական փուլերը։
Տեխնոլոգիաները չեն փոխարինի դիզայներին, բայց տեխնոլոգիաներին տիրապետող դիզայները կփոխարինի նրան, ով դրանք անտեսում է։ Այս գործիքները ձեր «զենքերն» են՝ ժամանակ շահելու և ավելի ստեղծագործ աշխատանք կատարելու համար։
Տեխնոլոգիաները զարգանում են, իսկ դուք՝ նրանց հետ։ Թարմացրեք ձեր պորտֆոլիոն այս գործիքների օգնությամբ և ծանոթացեք դիզայնի ոլորտի ամենաթարմ ու պահանջված հաստիքներին staff.am-ում:
