staffmedia.am-ի սիրված MND շարքը վերադառնում է՝ ներկայացնելով ապրիլ ամսվա կարևոր իրադարձությունները: Ապրիլը գարնանաշող էր ոչ միայն եղանակի, այլև արդյունավետ միջոցառումների մասով։ Մեր գործընկերների և staff.am-ի նախորդ ամիսը ջերմ էր, հագեցած և իրադարձային։
Այս հոդվածում միասին կծանոթանանք Ֆիլիպ Մորրիս Արմենիայի և PMI Science-ի INKOMPASS-2025 վարձատրվող փորձնակության ծրագրի մանրամասներին, Հայաստանում անցկացվող մեծամասշտաբ Doing Digital Forum-ի և staffmedia.am-ի համագործակցությանը, մեր գործընկերոջ Բիբլոս Բանկ Արմենիայի յուահատուկ տաղավարին Career City Fest-ին, staff.am-ի անդամակցությանը ՏՀՏ Գործատուների միությանը։
Ընդունվում են INKOMPASS 2025 փորձնակության ծրագրի դիմումները
Ֆիլիպ Մորրիս Արմենիան և PMI Science-ը մեկնարկել են INKOMPASS-2025 վարձատրվող փորձնակության ծրագիրը, որը նախատեսված է վերջին կուրսի ուսանողների և վերջին 2 տարիների ընթացքում համալսարանն ավարտած մասնագետների համար։ Ծրագիրը 6 ամսվա ընթացքում մասնակիցներին հնարավորություն է տալիս ներգրավվել իրական բիզնես նախագծերում՝ աշխատելով ստեղծագործ, բազմամշակույթ միջավայրում։
Փորձնակությունն առաջարկվում է մի շարք ուղղություններով՝ իրավաբանություն, մարքեթինգ, ֆինանսներ, տվյալագիտություն, ԱԲ, ինժեներիա և այլն։ Դիմելու համար անհրաժեշտ է լրացնել դիմում, անցնել առցանց թեստ, իսկ հաջող անցնելու դեպքում՝ մասնակցել հարցազրույցի։
Դիմումների վերջնաժամկետն է՝ 20.05.2025։
staffmedia.am-ը՝ թվային ապագայի ուղեկից | Doing Digital forum-ի կարևոր ուղերձները
Երևանը ապրիլին դարձավ թվային տնտեսության կենտրոն, երբ ավելի քան 1000 մասնակից 15+ երկրներից մասնակցեց Doing Digital Forum-ին՝ քննարկելու ապագայի փողը, տեխնոլոգիական զարգացումները և տնտեսական փոփոխությունները։
staffmedia.am-ը, լինելով ֆորումի մեդիա գործընկերը, լուսաբանեց ոչ միայն օրակարգային քննարկումները, այլև ներկայացրեց խորքային ուղերձները՝ առանձնացնելով այն միտումները, որոնք ձևավորում են ապագայի տնտեսությունը։
Մեր ուշադրության կենտրոնում էին թվային արժույթների էվոլյուցիան, նորարարական լուծումների դերը տնտեսական զարգացման մեջ և այն հնարավորությունները, որոնք կարող են ընձեռվել Հայաստանին՝ համաշխարհային ֆինթեք օրակարգում առաջ շարժվելու համար։
Բիբլոս Բանկ Արմենիան CCF 2K25-ի մասնակիցներին դիմավորեց բիզնես ֆոտոանկյունում
Մեր գործընկեր Բիբլոս Բանկ Արմենիան Career City Fest 2K25-ին ներկայացել էր յուրահատուկ ֆոտոանկյունով։ Երիտասարդ մասնագետների համար ստեղծված էր պրոֆեսիոնալ ֆոտոանկյուն, որտեղ հնարավոր էր ստանալ թե՛ LinkedIn-ի և CV-ի համար պրոֆեսիոնալ լուսանկարներ, թե՛ ժամանցային կադրեր:
Ֆոտոանկյունից բացի մասնակիցներին դիմավորում էին Բանկի ՄՌ կառավարման բաժնի աշխատակիցները՝ խորհուրդներով, հարցազրույցի պատրաստվելու լավագույն գիտելիքներով և Բիբլոս Բանկ Արմենիայում աշխատանքի հնարավորություններով։
Բիբլոս Բանկ Արմենիան՝ թե՛ որպես գործատու, թե՛ որպես ֆինանսական գործունեություն ծավալող ընկերություն, մեծապես կարևորում է շարունակական կրթության դերը։
Կրթությունը նաև Բանկի կորպորատիվ սոցիալական պատասխանատվության կարևորագույն ուղղությունն է։
staff.am-ն անդամակցում է ՏՀՏ գործատուների միությանը
Տեղեկատվական և հաղորդակցման տեխնոլոգիաների (ՏՀՏ) ոլորտը Հայաստանում շարունակում է մնալ տնտեսության առավել դինամիկ զարգացող ճյուղերից մեկը՝ ապահովելով զգալի ներդրում երկրի տնտեսական աճի, միջազգային մրցունակության բարձրացման և նորարարական էկոհամակարգի ձևավորման գործում։ Այս համատեքստում staff.am-ը՝ որպես Հայաստանի աշխատաշուկայի առաջատար հարթակ, մշտապես ձգտում է հանդես գալ ոչ միայն որպես գործատուների և աշխատանք փնտրողների կապող օղակ, այլև նպաստել ՏՀՏ ոլորտի համակարգային զարգացմանը։
Ապրիլի 18-ին staff.am-ի թիմը մասնակցեց ՏՀՏ Գործատուների Միության նոր անդամների ընդունելության միջոցառմանը, որտեղ ներկայացրեց էկոհամակարգի չորս հիմնական ուղղությունները՝ ընդգծելով այն գործիքներն ու նախաձեռնությունները, որոնք աջակցում են ինչպես գործատուներին, այնպես էլ մասնագետներին՝ կարիերայի և կրթության բոլոր փուլերում։
