staffmedia.am սյունակագիր, «Հաջողակ գործարարների 7 սովորություն», հոդվածի աղբյուրը՝ այստեղ:
sme.acba.am-ը հարթակ է, որը բիզնեսի կառավարմանն ու աջակցմանն ուղղված տեղեկատվության, գործիքների և ծառայությունների ամբողջություն է օնլայն տիրույթում։ Հարթակի հիմնական նպատակն է օժանդակել ՓՄՁ ղեկավարներին նոր գիտելիքների և կառավարման համար անհրաժեշտ գործիքների ձեռքբերման հարցում, ինչպես նաև ստեղծել նոր համագործակցությունների և գործընկերությունների հնարավորություններ: Կայքում առկա են ուսուցողական հոդվածներ, հոլովակներ, ձևանմուշներ և առցանց ուսուցման գործիքներ, որոնք կարող են օգտակար լինել ինչպես սկսնակ, այնպես էլ փորձառու գործարարների համար
Այս անգամ ձեզ համար առանձնացրել ենք մի քանի ֆիլմ, որոնք դիտելուց հետո վստահ ենք՝ ունենալու եք մոտիվացիայի մեծ պաշար, որը ձեզ օգնելու է իրականություն դարձնել վաղուց ձեր մտքում եղած բիզնես գաղափարները։
Ինչպես ցույց են տալիս այս ֆիլմերի գլխավոր հերոսները, սեփական բիզնես ստեղծելը հեշտ չէ, և երբեմն մի փոքր ոգեշնչում է պետք, որպեսզի շարունակես նույն եռանդով աշխատել:
1. The Founder
Սննդի հսկա ցանցը՝ McDonald’s-ը, հայտնի է ամբողջ աշխարհում։
Այս ֆիլմը Մակդոնալդ եղբայրների մասին է, որոնք հիմնել են McDonald’s-ը և մեկ այլ մարդու՝ Ռեյ Կրոկի մասին, որը եղբայրների կողմից կառավարվող փոքրիկ սննդի կետը վերածում է արագ սննդի համաշխարհային ցանցի և հայտնի բրենդի։
Ֆիլմը ցույց է տալիս, թե ինչպես է հաջողության հասնելու պատրաստակամությունն ու նվիրված լինելը բերում հաջողության՝ միաժամանակ շեշտելով, թե որքան դժվարությունների կարող եք հանդիպել բիզնեսում, եթե բավականաչափ սրամիտ ու ինքնավստահ չեք:
Միևնույն ժամանակ ֆիլմում անընդհատ ցուցադրվում է այն փաստը, որ միշտ կա վտանգ, որ մրցակիցները կարող են առաջ անցնել ձեզանից։
Սովորել ձախողումներից
ֆիլմը ցույց է տալիս, որ անհաջողություններից հնարավոր է մեծ փորձ ձեռք բերել:
Չնայած որոշակի անհաջողություններին՝ Կրոկը դրանք օգտագործեց`որպես իր կողմից ընտրված ռազմավարությունը բարելավելու և կատարելագործելու հնարավորություն:
2. The Social Network
Բոլոր ժամանակների լավագույն բիզնես ֆիլմերից մեկն անկասկած “The Social Network” ֆիլմն է։ Ֆիլմը պատմում է Facebook-ի՝ բոլոր ժամանակների ամենաազդեցիկ և հաջողված սոցիալական մեդիա հարթակներից մեկի հաջողության, Մարկ Ցուկերբերգի և այն ամենի մասին, ինչի միջով նա անցել է՝ որպես գործարար և ծրագրավորող՝ հասնելով այնտեղ, որտեղ գտնվում է այսօր: Ֆիլմը նաև անդրադառնում է բիզնեսի մութ կողմերին և այն խոչընդոտներին, որոնք կարող են առաջանալ հաջողակ դառնալու ճանապարհին: Եվ հենց դրանից հետո կարող է հարց առաջանալ՝ «իսկապե՞ս պետք է դառնամ գործարար», քանի որ հաջողության հասնելու համար անհրաժեշտ է համբերություն և համառություն։
Ֆիլմն անընդհատ հիշեցնում է, որ խոշոր ընկերությունները, ինչպիսին է Facebook-ը, պատահաբար ու հեշտ ճանապարհով չեն հասել ներկայիս հաջողությանը և դրանց հետևում թաքնված է մարդկային պատմություն՝ արժեքավոր դասերով՝ թե՛ գործարարների, թե՛ հենց բիզնեսի համար:
Հասնել նպատակներին
The Social Network ֆիլմը սովորեցնում է, որ ձեր առջև դրված նպատակներին հասնելու համար պետք է անսահման նվիրված լինել դրա իրականացմանը։ Չնայած բազմաթիվ մարտահրավերներին, հակամարտություններին ու խոչընդոտներին՝ Մարկ Ցուկերբերգը շարունակում է կենտրոնացած մնալ իր նպատակի վրա և շարունակում է աշխատել այն իրականություն դարձնելու համար:
3. Joy
Joy ֆիլմը բիզնեսի խնդիրները համառության ու նվիրված աշխատանքի միջոցով հաղթահարելու մասին է: Ֆիլմը հիմնված է գործարար և գյուտարար Ջոյ Մանգանոյի իրական պատմության վրա, ով հաղթահարեց նորարարական կենցաղային ապրանքներ ստեղծելու և շուկա հանելու մարտահրավերները: Ֆիլմում ներկայացված է Ջոյի անցած ճանապարհը, երբ նա պայքարող, միայնակ մայր լինելուց վերածվում է հաջողակ գործարար կնոջ՝ իր ճանապարհին հանդիպելով շատ խոչընդոտների։ Բեկումնային պահը գալիս է, երբ Ջոյը ստեղծում է տնային գործերի համար նախատեսված հեղափոխական միջոցը։ Պրոդուկտի ստեղծման գաղափարը նրա մոտ ծագում է այն բանից հետո, երբ նա պայքարում է ավանդական միջոցների դեմ: Չնայած սահմանափակ ֆինանսական ռեսուրսներին՝ Ջոյը որոշում է ներդնել իր խնայողությունները պրոդուկտի արտադրման գործընթացում։ Ջոյը ընթացքում տարբեր խնդիրների հետ է բախվում, սակայն նրա վճռականությունն ու հաստատակամությունը օգնում են հասնել հաջողությունների։
Հավատարիմ մնացեք ձեր գաղափարին
Եթե դուք իսկապես հավատում եք ձեր նպատակների իրականացմանը, արեք հնարավոր ամեն բան, մինչև հասնեք դրան:
4. The Greatest Showman
«Մեծագույն շոումեն» ֆիլմը արժեքավոր պատկերացումներ է տալիս բիզնեսի, նորարարության և բիզնեսի մարդկային կողմի մասին՝ ընդգծելով հաջողության հասնելու մեջ երևակայության, ստեղծարարության և ճկունության կարևորությունը: Ֆիլմում պատկերված է գլխավոր հերոսի՝ Բարնումի վերելքը՝ աղքատությունից մինչև հաջողակ գործարար ու շոումեն դառնալը: Բարնումը միշտ երազում էր իր տեղն ունենալ պատմության մեջ, բայց իր ոչ մի մասնագիտություն իրեն չէր գոհացնում։ Եվ երբ թվում էր, որ աշխարհն իրենից երես է թեքել, նա որոշում էգնալ իր երազանքի հետևից։ Բարնումը ստեղծում է հետաքրքրիր ներկայացում, որն էլ դառնում է համաշխարհային շոուբիզնեսի սկիզբը։ Ֆիլմից կարելի է սովորել հերոսի՝ ցանկացած տեղ հնարավորություն տեսնելու և ռիսկի դիմելու մեծ պատրաստակամությունը։
Դիմե՛ք ռիսկի
Բիզնես աշխարհում նորարարությունը հաճախ ենթադրում է ռիսկեր և կաղապարներից դուրս մտածելակերպ։
Պատրաստ եղե՛ք ընդունել ձեզ ուղղված մարտահրավերները, փոփոխություններն ու վճռականորեն հետևե՛ք Ձեր երազանքներին։
5. The Joneses
Ֆիլմի սյուժեն զարգանում է նրա շուրջ, որ չորս հոգուց բաղկացած թվացյալ բարեկեցիկ ընտանիքը ժամանում է ամերիկյան էլիտար քաղաք: Սակայն այս ընտանիքն իրական ընտանիք չէ, այլ թիմ, որն իրականացնում է շքեղ ապրանքների թաքնված գովազդ։ Ֆիլմում ներկայացված է ժամանակակից ինֆլուենսինգի նախատիպը, թե ինչպես է հասարակությունը հետևում մեծ ազդեցություն ունեցող մարդկանց և գնումներ կատարում։ Սակայն միևնույն ժամանակ ֆիլմում ցուցադրվում է նաև մարքեթինգի բացասական կողմը, թե ինչպես են դառնում գովազդի ու մարքեթինգի զոհ։
Մի՛ թերագնահատեք մարքեթինգի դերը
Մարքեթինգի և գովազդի ազդեցությունը շատ մեծ է սպառողների վարքագծի վրա։ Ձեր սպառողներին կարող եք դրդել ավելի շատ գնումներ կատարել, երբ ավելի լավ իմանաք սպառողների խնդիրները ու ցանկությունները՝ խորապես բացահայտելով նրանց հոգեբանությունը և վարքագիծը։
